Կիրակի, 13 մայիս 2012-ին, Այնթուրայի դպրոցի եկեղեցւոյ մէջ տեղի ունեցաւ Ս. պատարագ,
զոր մատոյց գերյ. Գաբրիէլ Թ. Ծ. վրդ. Մուրատեան` ի ներկայութեան բազմաթիւ հաւատացեալներու,
ոգեկոչելու համար 300 հայ որբուկներու յիշատակը, որոնք ենթարկուած էին ամէնէն վայրագ
վարուելակերպին այս դպրոցին մէջ` 1914-ի մեծ պատերազմի ընթացքին, Օսմանեան պետութեան
գործիչներու կողմէ: Սրբազան ծէսի արարողապետն էր եղբ. Ճոնի Պլպլէն, երգեցողութիւնը
կատարեցին մանկապատանեկան «Բլբուլ» երգչախումբը եւ Զմմառու վանքի ժառանգաւորները. ղեկավարութեամբ՝
մայեսթրօ Մանուէլ սրկ. Քէշիշեանի: Այս առթիւ ելոյթ ունեցաւ Ղազար Պետրոսեան: Զալքայի
եւ Էշրեֆիէի ՀԿՄ պատանեկանը հսկեց կարգ ու կանոնին վրայ, Լիբանանի Հայ դատի մարմինի անդամներուն
պատրաստած մեծ պաստառները ցուցադրուած էին եկեղեցւոյ մուտքին: Նաեւ այս առիթով հայ որբուկին
նուիրուած խոշոր պաստառը կախուած էր սոյն վարժարանի մուտքին: Այս առիթով պատարագիչ
գերյարգելի վարդապետը իր խօսքին մէջ ըսաւ. «Երբ ցեղային եւ կրօնային ջարդեր տեղի կ՛ունենան
տարբեր տեղեր, միթէ՞ աշխարհը լաւ կ՛ըլլայ: Երբ մէկուկէս միլիոն հայ խոշտանգուի, արդեօ՞ք
միջազգային կարծիքն ու աշխարհը խիղճ կ՛ունենայ: Հայոց ցեղասպանութիւնը, որ ծրագրուեցաւ
Օսմանեան կայսրութեան կողմէ Պոլսոյ մէջ, կը նկատուի մարմնացում եւ իրականացում մշակուած
ծրագիրի մը: Բոլոր մտածուած միջոցները գործադրուեցան, որոնց ըմբռնումը մարդկային միտքը
չի կրնար տանիլ: Սակայն անոնք իրենց նպատակին չհասան, իբրեւ փաստ` մեր ներկայութիւնը
այստեղ, մեր քրիստոնեայ հաւատքը, մեր գրիչը, խօսքը, մեր տրոփուն սիրտը, հայապահպանումը
եւ մեր աւանդութիւններուն տէր կանգնիլը»: Մեծաւոր Հայրը իր խօսքը ուղղելով լիբանանցի
հայուն ըսաւ ՜՜ դուն չես կրնար կտրուիլ քու անցեալէդ եւ չես կրնար զայն մոռնալ: Իսկ եթէ
մոռնաս, կը կորսնցնես քու ինքնութիւնդ, ինչ որ թուրքերը չկրցան ընել: Չես կրնար ուրանալ
կրօնդ, որովհետեւ այն ազգը, որ ունեցած է նման քաջարի նահատակներ, չի կրնար անտարբեր
մնալ»։ Յիշատակելի է փոքրիկի մը վկայութիւնը, թէ մենք չենք մոռնար մեզ նման փոքրերու
խոշտանգումը այս վայրին մէջ, սակայն մենք տակաւին կանք ու պիտի մնանք հայ քրիստոնեայ:
Յաւարտ Ս. պատարագին բոլորը իրենց ձեռքերը կարմիր կանթեղներ ու վարդեր բռնած թափօրով
ուղղուեցան դէպի գերեզմանատուն, ուր զետեղուած է խաչքար մը հայ որբուկներու գերեզմանին
վրայ, եւ զանոնք հոն զետեղեցին, ապա հոգեհանգստեան պաշտօն կատարուեցաւ: